認識摩洛哥：一個站在非洲，卻望向歐洲與中東的國度
- Feb 1
- 4 min read
如果講起摩洛哥，你第一樣會諗起咩呢？撒哈拉沙漠？駱駝？有個藍色既城市？地球上碩果僅存既天然皮革染坊？新聞入面成日出現嘅「伊斯蘭國家」？電影北非諜影？全部都岩，摩洛哥就係一個咁多元既國家，呢度係文明嘅交匯處，地理上屬於非洲，一邊望住大西洋，一邊接住地中海，隔住直布羅陀海峽，同西班牙只係十四公里之遙。但當你身處摩洛哥，你會發現摩洛哥一點非洲影子都沒有。語言上，官方語言雖然係阿拉伯文，但係城市，商業或日常用語，更多人講既係法文同西班牙文，到底摩洛哥係一個點樣嘅國家？
摩洛哥嘅歷史，可以話係一部「被不同文明反覆寫過」嘅書，有考古證據顯示，4000年前已有人在現今摩洛哥領土上生活，後來經過戰爭，被歐洲列強如法國，西班牙殖民，再於1956年獨立，歷史既層層疊加令摩洛哥有無比吸引力。
摩洛哥最早嘅原居民係「阿馬齊格人 / 柏柏爾人 (Amazigh / Berber)」，Amazigh係阿馬齊格人既自稱，意思係「自由的人」，而柏柏爾人源自古希臘／羅馬對外族人嘅稱呼，帶少少貶義，有野蠻，落後既意思；但其實佢地一點都唔落後，阿馬齊格係遊牧民族，係撒哈拉沙漠一帶由新石器時代開始已經居住超過 4000年，不同部落散落在沙漠地區生活，包括現今摩洛哥，阿爾及利亞，突尼西亞等非洲地區。
佢地雖然係沙漠生活，但當時已經懂得結合遊牧和農耕，於阿特拉斯山脈 (Atlas Mountains) 建立山區梯田、綠洲灌溉系統，自給自足。
7世紀時阿拉伯帝國向外擴張，沿地中海抵達摩洛哥，帶來伊斯蘭教同阿拉伯文化，7-12世紀，係阿馬齊格歷史既高峰，當時貿易興盛，要將非洲既資源，例如黃金，鹽，香料，甚至奴隸等運往歐洲，依靠既係阿馬齊格既駱駝商隊，帶領橫越撒哈拉沙漠。阿馬齊格人世世代代係沙漠生活，利用天文定位確認路線，熟知補給點和水源等，阿馬齊格人在貿易上擔任重要角色。但曾經過被阿拉伯人統治，阿馬齊格人大量與阿拉伯人通婚，直到今日，有阿馬齊格血統的摩洛哥人只佔全國人口三至四成；而殖民時期阿馬齊格語曾一度被禁，被除名只剩下「民俗」標籤，被邊緣化，但阿馬齊格文化並沒有失去。
我地經常聽到既摩洛哥傳統美食塔吉鍋 (Tagine)，係一種摩洛哥傳統陶鍋，由兩個部分組成，圓形淺底鍋加上尖錐形鍋蓋組成。常見食材組合有肉類：羊肉、牛肉或雞肉，放在蔬菜：洋蔥、番茄、南瓜上，加上乾果和香料。傳統做法將陶鍋放炭火上，蒸氣上升，碰到尖錐形冷鍋蓋再流回鍋底，用極低火慢煮，食材可以低水不易乾；係阿馬齊格人既傳統智慧，慢煮，一鍋完成同時保存營養，特別適合高山寒冷，沙漠乾燥，水源有限地區。而食塔吉鍋通常都係一家人圍住，無分盤，用手拈麵包沾汁食，食法都是文化的一種，亦象徵家庭的重要性。
而摩洛哥國菜古斯米 (Couscous) 更加係阿馬齊格人核心嘅主食同文化象徵之一。古斯米係一種經過處理既粗粒小麥穀物，唔係米，傳統古斯米會放喺蒸籃 (Keskes)，底下係燉肉／燉菜嘅湯，蒸氣帶動味道上升，重複蒸 2-3 次，中途用手搓散，再加上少少橄欖油或牛油進食。
係阿馬齊格人既傳統節慶，例如婚禮，出生，收成，喪禮後嘅家庭聚餐；又或者係星期五，伊斯蘭教最重要的 嘅每周 宗教 儀式 — 主麻 (Jumu'ah) 聚禮後必食。古斯米唔係一個好名貴既菜式，但佢點解會成為國菜？古斯米橫跨所有民族、階層、地區；另因為一大盤需要時間蒸煮，適合家庭分享，而且慢食係家庭團聚既價值觀；而好多家庭亦會煮多而分比有需要既人，同伊斯蘭「慈善 (Zakat)」精神一致。古斯米於2020年由阿爾及利亞、毛里塔尼亞、摩洛哥同突尼西亞聯合申報成功，以「與製作及食用古斯米有關嘅知識、技藝同習俗」名義入選 UNESCO 非物質文化遺產。
摩洛哥官方語言雖然係阿拉伯文 (Darija)，但日常生活其實好少人用標準阿拉伯語講話，摩洛哥阿拉伯語都混入大量阿馬齊格語結構，充滿住阿馬齊格文化既歷史層疊。
曾經好長一段時間，阿馬齊格文化被刻意壓低，官方文件只准用阿拉伯語，媒體避免使用「Amazigh」身份，好多人有阿馬齊格血統，但都唔敢講自己係阿馬齊格人，年輕一代有身份焦慮，語言斷層。但近年文化、語言同身份重建運動形成阿馬齊格文化復興 (Amazigh Cultural Revival)，2011年阿拉伯之春捲捲北非，突尼西亞，埃及，利比亞均出現大規模示威，而摩洛哥王室提出「多元摩洛哥身份」，修憲承認阿馬齊格語 (Amazigh) 為摩洛哥官方語言，阿馬齊格人由「被邊緣化」走向「被承認、被看見、被尊重」，對阿馬齊格人的文化認同產生重大影響。
阿馬齊格文化係摩洛哥既重要根基，而摩洛哥被稱為最開放伊斯蘭國家之一，同阿馬齊格文化有關嗎？走入 四大 古城 之一 的 Marrakech 居然還有夜生活？
下期再續。
背包旅人 陳希 - 喜歡自駕遊，享受隨心的旅遊模式，與在地人交換生活的瞬間。曾於冰島歐美板塊裂縫潛水，紐西蘭跳傘及笨豬跳等極限運動，但最令人回憶是在 Uluru 撿柴，圍着火爐露營，仰望的靜空。
Comments